සේවා වනිතා ව්‍යාපෘතින් ක්‍රියාත්මක කරන නාවික හමුදා ආයතනයන්හි සංවත්සර දිනය සැමරිමට සේවා වනිතා ඒකකයෙන් අත්වැලක්
නාවික හමුදා සේවා වනිතා ඒකකයේ ගරු සභාපතිනී, සන්ධ්‍යා රණසිංහ මහත්මියගේ සංකල්පයකට අනුව සේවා වනිතා ඒකකය මඟින් නාවික හමුදා පුද්ගලයින් හට ලබා දෙනු ලබන සුභසාධක කටයුතු වඩාත් පුළුල් කිරීමේ අරමුණින් සේවා වනිතා ව්‍යාපෘතින් ක්‍රියාත්මක වන ආයතනයන්හි නෞකා දිනයට සමගාමිව පවත්වනු ලබන වැඩසටහන් ක්‍රියාත්මක කිරීම සඳහා රුපියල් 25,000.00 ක මුදල් පරිත්‍යාගයක් කිරීමට සැලසුම් කරන ලදි.
ඒ අනුව, එහි සමාරම්භය සනිටුහන් කරමින් ශ්‍රී ලංකා නාවික නෞකා ‘රුහුණ’, ශ්‍රී ලංකා නාවික නෞකා ‘තම්මැන්නා’ සහ ශ්‍රී ලංකා නාවික නෞකා ‘මහානාඝ’ ආයතනයන් වෙත රුපියල් 25,000.00 බැගින් මුදල් ප්‍රදානය කිරීම පසුගිය නොවැම්බර් 23 වන දින නාවික හමුදා සේවා වනිතා ඒකකයේ ගරු සභාපතිනී, සන්ධ්‍යා රණසිංහ මහත්මියගේ ප්‍රධානත්වයෙන් නාවික හමුදා සේවා වනිතා කාර්යාලයේදී සිදු කරන ලදී.
