2024 ජනවාරි මස 26 වන දින බංගලාදේශයේ පැවති ‘ඩකා මැරතන් ශූරතාවලිය - 2024’ සඳහා ශ්‍රී ලංකාව නියෝජනය කරමින් සහභාගී වූ නාවික හමුදා ක්‍රීඩක නායක නැවි ආර්ඩීඑන්එස් කරුණාරත්න විසින් එහි හත්වන (07) ස්ථානය දිනා ගැනීමට සමත් විය.

2024 ජනවාරි මස 21 වන දින හොංකොංහි පැවති ‘19 වන ආසියානු මැරතන් ශූරතාවලිය - 2024’ සඳහා ශ්‍රී ලංකා නාවික හමුදා ක්‍රීඩිකා නායක කාන්තා නැවි එම්එස්පීඑම් පෙරේරා සහභාගී වූ අතර, එහිදී පස්වන (05) ස්ථානය දිනා ගැනීමට සමත් විය.

ශ්‍රී ලංකා පිළිමලුන් පිටු දැකීමේ බේස්බෝල් තරඟාවලිය, 2024 ජනවාරි මස 06 සිට 21 වන දින දක්වා, දියගම ශ්‍රී ලංකා ජපන් මිත්‍රත්ව බේස්බෝල් ක්‍රීඩාංගණයේදී පැවති අතර, අවසන් තරඟයේදී නාවික හමුදා පිරිමි බේස්බෝල කණ්ඩායම එහි අනුශූරතාවය දිනා ගැනීමට සමත් විය.

‘ජාතික රුවල් ඔරු තරඟාවලිය’ 2024 ජනවාරි මස 19 සහ 20 යන දිනයන්හීදි මට්ටක්කුලිය කාක දූප‍තේදී, නාවික හමුදා නියෝජ්‍ය මාණ්ඩලික ප්‍රධානී හා අධ්‍යක්‍ෂ ජෙනරාල් මෙහෙයුම් රියර් අද්මිරාල් ප්‍රදීප් රත්නායක ගේ ප්‍රධානත්වයෙන් සාර්ථකව පැවැත්වුණු අතර, එහිදී නාවික හමුදා රුවල් ඔරු සංචිතය විසින් ජයග්‍රහණ රැසක් දිනාගැනීමට සමත් විය.

96 වන ‘ජාතික බොක්සිං ශූරතාවලිය - 2023’(96th BASL Men & Women National Boxing Championship 2023), 2024 ජනවාරි මස 17 වන දින කොළඹ, රාජකීය විද්‍යාලයේ රෝයල් මාස් එරීනා බොක්සින් වළල්ලෙහිදී පැවැති අතර,එහිදී නාවික හමුදා පිරිමි සහ කාන්තා බොක්සිං කණ්ඩායම් ජයග්‍රහණ රැසක් දිනා ගැනීමට සමත් විය.

2024 ජනවාරි මස 12 සිට 14 වන දින දක්වා වැලිසර, නාවික හමුදා වෙඩි තැබිමේ සංකිර්ණයේදී පැවති ‘Sweep & Shoot 2024 Two gun Championship’ ප්‍රායෝගික පිස්තෝල වෙඩි තැබිමේ තරඟාවලියේදී, නාවික හමුදා ක්‍රීඩක ක්‍රීඩිකාවන් ඒකල හා කණ්ඩායම් වශයෙන් ජයග්‍රහණ රැසක් හිමි කර ගැනීමට සමත් විය.

ජාත්‍යන්තර තලයේ ක්‍රීඩා ජයග්‍රහණ මව්බිමට හිමි කරදුන් නාවික හමුදා ක්‍රීඩක ක්‍රීඩිකාවන් 2024 ජනවාරි මස 16 වන දින නාවික හමුදා මූලස්ථානයේදී, නාවික හමුදා ක්‍රීඩා මණ්ඩලයේ සභාපති වශයෙන් කටයුතු කරනු ලබන නාවික හමුදාධිපති, වයිස් අද්මිරාල් ප්‍රියන්ත පෙරේරා හමුවූ අතර, මව්බිමට අභිමානයක් ගෙනදෙමින් නාවික හමුදා ක්‍රීඩක ක්‍රීඩිකාවන් ලද සුවිශේෂී ජාත්‍යන්තර ක්‍රීඩා ජයග්‍රහණ අගයමින්, එහිදී නාවික හමුදාධිපති විසින් ඔවුන් වෙත වටිනා මුදල් ත්‍යාග පිරිනැමීම සිදු කෙරිණි.

ශ්‍රී ලංකා මෝටර් රථ සහ යතුරුපැදි ධාවකයින්ගේ සංගමය මඟින් සංවිධානය කරන ලද ‘‍මහමේරුව සුපර් ක්‍රොස්’ ධාවන තරඟාවලිය, 2024 ජනවාරි මස 14 වන දින ගිරිඋල්ල, මහමේරුව ධාවන පථයේදී පැවති අතර, එහිදී යතුරු පැදි අංශයේ ජයග්‍රහණ හිමි කර ගැනීමට නාවික හමුදා ක්‍රීඩකයින් සමත් විය.

නාවික හමුදා ගොල්ෆ් ක්‍රීඩක සාමාන්‍ය නැවි චලිත පුෂ්පික 2024 ජනවාරි මස 31 වන දින සිට 2024 පෙබරවාරි මස 03 වන දින දක්වා බංගලාදේශයේ ඩකා හි කුර්මිටෝලා ගොල්ෆ් පිටියේදී පැවැත්වීමට නියමිත ඔරියන් සමූහ 37 වැනි බංගලාදේශ ආධුනික ගොල්ෆ් ශූරතාවලිය සඳහා ශ්‍රී ලංකාව නියෝජනය කරමින් සහභාගී වීමට සුදුසුකම් ලබාගැනීමට සමත් විය.

පොළොන්නරුව, ගල්ලෑල්ල ජාතික ක්‍රීඩා සංකීර්ණයේදී 2023 දෙසැම්බර් මස 27 වන දින සිට 30 වන දින දක්වා පැවති ජාතික බර ඉසිලීමේ තරඟාවලියේදී නාවික හමුදා කාන්තා බර ඉසිලිමේ කණ්ඩායම සම ශූරතාවයන් දිනාගැනීමට සමත් වූ අතර, එහිදී කිලෝග්‍රෑම් 87 ජ්‍යේෂ්ඨ කාන්තා බර ඉසිලීමේ ඉසව්ව සඳහා සහභාගී වූ බලකාන්තා නැවි බීසී ප්‍රියන්ති ක්‍රීඩිකාව විසින් නව ශ්‍රී ලංකා තරඟ වර්ථා තුනක් පිහිටුවීමට ද සමත් විය.