නාවික හමුදාව මධ්‍යම, බස්නාහිර, සබරගමුව සහ වයඹ පලාත් තුල සිදුකල අඛණ්ඩ ආපදා සහන මෙහෙයුම් මඟින් පුද්ගලයන් 882ක් වෙත සහන සලසයි
අයහපත් කාලගුණික තත්වය හමුවේ මධ්‍යම, බස්නාහිර, සබරගමුව සහ වයඹ පලාත් තුල පීඩාවට පත්වන මහජනතාවට සහන සැලසීම සඳහා නාවික හමුදාව අද දිනයේදීත් (2025 නොවැම්බර් 29) අඛණ්ඩ මෙහෙයුම් සිදු කෙරිණි. ඒ අනුව, බටහිර නාවික විධානය මඟින් මහනුවර, ගන්නෝරුව, ගම්පොළ, කටුගස්තොට, හලාවත, රත්නපුර, කොළොන්නාව, මීගොඩ, අවිස්සාවෙල්ල තල්දූව, වැලිවිට, දිවුලපිටිය, බඩල්ගම, මහවැව, ගිරිඋල්ල, කෑගල්ල, රුවන්වැල්ල, අයගම, කලවාන, මාරපන සහ මීරිගම යන ප්‍රදේශ ආවරණය වන පරිදි සිදුකල ආපදා සහන මෙහෙයුම් මඟින්, ගංවතුරෙන් ආපදාවට පත්ව අවදානමට ලක්ව සිටි පුද්ගලයන් 882 දෙනෙකු වෙත අවශ්‍ය සහන සැලසීම සිදු කෙරිණි.
