තායිවානයේ, තායිපේහිදී පැවැත්වෙන තායිවාන විවෘත මලල ක්‍රීඩා තරඟාවලියේ 2024 ජුනි මස 01 වන දින පැවති මීටර් 1500 කාන්තා ධාවන ඉසව්ව සඳහා ශ්‍රී ලංකාව නියෝජනය කරමින් සහභාගී වූ ශ්‍රී ලංකා නාවික හමුදාවේ කාන්තා සුළු නිලධාරී ගයන්තිකා අබේරත්න ක්‍රීඩිකාව, එම ඉසව්වේ රිදී පදක්කම මව්බිමට දිනාදීමට සමත් විය.

ශ්‍රී ලංකා නාවික හමුදාවේ නායක ඉංජිනේරු කාර්මික ආර්පී සමන් කුමාර සිරිවර්ධන දින 07 යි පැය 11 යි මිනිත්තු 17 යි තත්පර 14 කින් කිලෝමීටර් 586.1 ක්, පූනෑව සිට කොළඹ නිදහස් චතුරශ්‍රය දක්වා පැමිණ නැවත පූනෑව දක්වා ගමන් කර, 2024 ජනවාරි මස 19 වන දින නව ලෝක වාර්තාවක් පිහිටුවීමට අදාල සහතික පත්‍රය, කුසලානය සහ පදක්කම එම නාවිකයා වෙත පිරිනැමීම 2024 මැයි මස 18 වන දින කොළඹ ක්‍රීඩා වෛද්‍යායතනයේදී සිදුකෙරිණි.

2024 මැයි 15 වන දින සිට 17 වන දින දක්වා පැවති අන්තර් විධාන වේඩිතැබීමේ තරඟාවලිය - 2024, නාවික හමුදා වෙඩි සංචිතයේ සභාපති කොමදෝරු නිශාන් රණවීර ගේ ආරාධනයෙන් උතුරු මැද නාවික විධානයේ ආඥාපති රියර් අද්මිරාල් ඩේමියන් ප්‍රනාන්දු ගේ ප්‍රධානත්වයෙන් ශ්‍රි ලංකා නාවික නෞකා ශික්ෂා ආයතනයේ වෙඩිපිටියේදී පැවැත්වීමට කටයුතු කෙරිණි.

ශ්‍රී ලංකා බේස්බෝල් සංගමය මඟින් සංවිධාන කල 2024 ජාතික සුපර් ලීග් බේස්බෝල් ශූරතාවලිය, 2024 මැයි මස 10 සහ 11 යන දිනයන්හීදී දියගම, ශ්‍රී ලංකා ජපන් මිත්‍රත්ව බේස්බෝල් ක්‍රීඩාංගනයේදී පැවති අතර, එහිදී නාවික හමුදා පිරිමි බේස්බෝල් කණ්ඩායම එහි අනුශූරතාවය දිනා ගැනීමට සමත් විය.

2024 අප්‍රේල් මස 27 වන දින සිට 29 වන දින දක්වා බණ්ඩාරගම ගෘහස්ථ ක්‍රීඩාංගනයේදි පැවති 2024 ජාතික කරාතේ ශුරතාවලියේදී නාවික හමුදා පිරිමි හා කාන්තා කරාතේ කණ්ඩායම් රන් පදක්කම් හතරක් (04) රිදී පදක්කම් තුනක් (03) සහ ලෝකඩ පදක්කම් නවයක් (09) දිනාගැනීමට සමත් විය.

අන්තර් විධාන තුන්ප්‍රයාම තරඟාවලිය, 2024 අප්‍රේල් මස 27 සහ 28 යන දිනයන්හීදී නාවික හා සාගරික විද්‍යාපීඨයේ ආඥාපති සහ නැගෙනහිර නාවික විධානයේ නියෝජ්‍ය ආඥාපති කොමදෝරු බුද්ධික ලියනගමගේ ගේ ප්‍රධානත්වයෙන්, නාවික තටාකාංගනය සහ සැන්ඩිබේ වෙරළ තීරය ආශ්‍රිත ප්‍රදේශයේදී පැවති අතර, එහි පිරිමි ශූරතාවය නැගෙනහිර නාවික විධානය විසින් සහ කාන්තා ශූරතාවය පුහුණු විධානය විසින් දිනා ගැනීමට සමත් විය.

2024 අප්‍රේල් මස 18 වන දින සිට 2024 අප්‍රේල් මස 21 වන දින දක්වා පාකිස්ථානයේ ඉස්ලාමාබාද් පිහිටි Margalla Greens Golf Club හි පැවති 63 වැනි පාකිස්ථාන ජාතික ආධුනික ගොල්ෆ් ශූරතාවලියේ කණ්ඩායම් ඉසව්ව සඳහා ශ්‍රී ලංකාව නියෝජනය කරමින් සහභාගී වූ නාවික හමුදා ගොල්ෆ් ක්‍රීඩක සාමාන්‍ය නැවි චලිත පුෂ්පික සහ කොළඹ රාජකීය ගොල්ෆ් සංගමයේ උචිත රණසිංහ විසින් ජේආර් ජයවර්ධන කුසලානය දිනාගැනීමට සමත් විය.

ශ්‍රී ලංකා නාවික හමුදාව, ක්‍රීඩා අමාත්‍යංශය, ශ්‍රී ලංකා ජාතික කැනෝයි හා කායක් සංගමය සහ ඉන්දීය කැනෝයි හා කායක් සංගමය එක්ව, ප්‍රථම වරට සංවිධානය කල ශ්‍රී ලංකාවේ තලෙයිමන්නාරමේ සිට ඉන්දියාවේ ධනුෂ්කොඩි දෙසට වූ මුහුදු කායක් තරඟාවලිය (Adam's bridge paddle challenge) 2024 අප්‍රේල් මස 11 වන දින සාර්ථකව නිමාවට පත් විය.

ක්‍රීඩා අමාත්‍යංශය, ශ්‍රී ලංකා ජාතික කැනෝයි හා කායක් සංගමය (National Association of Canoeing and Kayak Sri Lanka – NACKSL) සහ ඉන්දියානු කැනෝයි හා කායක් සංගමය (Indian Kayaking and Canoeing Association – IKCA) එක්ව, ප්‍රථම වරට සංවිධානය කරනු ලබන ශ්‍රී ලංකාවේ තලෙයිමන්නාරමේ සිට ඉන්දියාවේ ධනුෂ්කොඩි දක්වා වූ මුහුදු කායක් තරඟාවලිය, ශ්‍රී ලංකා නාවික හමුදාවේ පූර්ණ දායකත්වයෙන් 2024 අප්‍රේල් මස 10 සහ 11 යන දිනයන්හීදී පැවැත්වීමට සියළු කටයුතු සූදානම් කර ඇත.

2024 අප්‍රේල් මස 06 වන දින යක්කල ප්‍රදේශය ආවරණය වන පරිදි පැවති යක්කල පාපැදි තරඟාවලිය - 2024 හි පිරිමි සහ කාන්තා තෙවන ස්ථාන නාවික හමුදාව විසින් දිනා ගැනීමට සමත් විය.