අඟුලාන මුහුදේ නාවිකයින් 11 දෙනෙකුගේ දිවි බේරාගැනීමට කැපවූ පොලිස් නිලධාරීන් නාවික හමුදාධිපතිගේ ඇගයීමට
අඟුලාන මුහුදු ප්රදේශයේදී ශ්රී ලංකා නාවික හමුදාවට අයත් පී 4447 වේග ප්රහාරක මුර යාත්රාව ආපදාවට ලක් වූ අවස්ථාවේදී, රළු මුහුදු තත්වය නොතකා කඩිනමින් මැදිහත් වී එහි සිටි නාවික පුද්ගලයන් එකොළොස් දෙනෙකුගේ (11) ජීවිත නිරුපද්රිතව බේරා ගැනීම සඳහා සුවිශේෂී කැපවීමකින් හා ධෛර්යයකින් කටයුතු කළ ශ්රී ලංකා පොලිස් දෙපාර්ථමේන්තුවට අයත් අඟුලාන පොලිස් ස්ථානයට අනුයුක්තව රාජකාරී කරනු ලැබූ පොලිස් නිලධාරීන් දස දෙනෙකු (10) ඇගයීමට ලක් කරමින් ප්රශංසාත්මක ලිපි ප්රදානය කිරීම අද දින (2026 අගෝස්තු 21) නාවික හමුදා මූලස්ථානයේදී නාවික හමුදාධිපති වයිස් අද්මිරාල් ඩේමියන් ප්රනාන්දු විසින් සිදු කරන ලදී.
මෙහිදී, අඟුලාන පොලිස් බල ප්රදේශය භාර නියෝජ්ය පොලිස්පති සමන්ත විජේසේකර මහතා, අඟුලාන පොලිස් ස්ථානයේ ස්ථානාධිපති ප්රධාන පොලිස් පරීක්ෂක සමන්ත බණ්ඩාර මහතා ඇතුළු පොලිස් නිලධාරීන් දස දෙනෙකු (10) වෙත අදාළ ප්රශංසාත්මක ලිපි ප්රදානය කෙරිණි.
මෙම ගලවා ගැනීමේ මෙහෙයුමේදී වෘත්තීයභාවයෙන්, නිර්භීතකමින් හා ක්ෂණික මැදිහත්වීමකින් යුතුව කටයුතු කරමින් නාවිකයින්ගේ ජීවිත බේරා ගැනීමට ලබාදුන් අගනා දායකත්වය මෙහිදී නාවික හමුදාධිපතිගේ විශේෂ ඇගයීමට ලක් විය. එමෙන්ම, සිය රාජකාරී සීමාවන්ගෙන් ඔබ්බට ගොස් ජීවිතාරක්ෂක මෙහෙයුම සඳහා දැක්වූ අඛණ්ඩ කැපවීම ශ්රී ලංකා නාවික හමුදාධිපති විසින් ඉතා ගෞරවාන්විතව සිහිපත් කරන ලදී.
තවද, මෙම ජීවිතාරක්ෂක මෙහෙයුමේදී නාවිකයින්ගේ ජීවිත ආරක්ෂා කිරීම සඳහා ශ්රී ලංකා පොලිසිය ලබාදුන් සහයෝගය, ශ්රී ලංකා නාවික හමුදාව සහ ශ්රී ලංකා පොලිසිය අතර පවතින ශක්තිමත් අන්තර් ආයතනික සහයෝගීතාවයේ සුවිශේෂී නිදසුනක් වන අතර, එම සහයෝගීතාව තවදුරටත් ශක්තිමත් කිරීමට මෙම ඇගයීම ඉවහල් වනු ඇත.