ශ්රී ලංකා නාවික හමුදාවේ 27 වැනි නාවික හමුදාධිපති වශයෙන් වයිස් අද්මිරාල් ඩේමියන් ප්රනාන්දු රාජකාරී ආරම්භ කරයි
ශ්රී ලංකා ප්රජාතාන්ත්රික සමාජවාදි ජනරජයේ ගරු ජනාධිපති හා සන්නද්ධ හමුදා සේනාධිනායක, අනුර කුමාර දිසානායක මැතිතුමා විසින් රියර් අද්මිරාල් ඩේමියන් ප්රනාන්දු, වයිස් අද්මිරාල් නිලයට උසස් කර, ශ්රී ලංකා නාවික හමුදාවේ 27 වැනි නාවික හමුදාධිපතිවරයා ලෙස අද (2026 ජූලි 01) සිට පත් කෙරිණි.
ඒ අනුව, අද (2026 ජුලි 01) උදෑසන, හිටපු නාවික හමුදාධිපති, අද්මිරාල් කාන්චන බානගොඩ විසින් අභිනව නාවික හමුදාධිපති වෙත නාවික හමුදා සාම්ප්රදායානුකූලව නාවික හමුදාධිපති ගේ අසිපත පිරිනැමීම සහ අභිනව නාවික හමුදාධිපති වෙත නාවික හමුදා සාමාජිකයින් හතලිස් අට දෙනෙකුගෙන් (48) සමන්විත විශේෂ සම්මාන ආචාර මුරයක් මඟින් ආචාරය පිරිනැමීම සිදු කෙරුණු අතර, ඉන් අනතුරුව සර්ව ආගමික ආශිර්වාද මධ්යයේ ශ්රී ලංකා නාවික හමුදාවේ 27 වන නාවික හමුදාධිපති වශයෙන් වයිස් අද්මිරාල් ඩේමියන් ප්රනාන්දු රාජකාරි ආරම්භ කරන ලදි.
වෙන්නප්පුව, ශාන්ත ජෝශප් වාස් විද්යාලයේ දීප්තිමත් ආදි ශිෂ්යයෙකු වන වයිස් අද්මිරාල් ඩේමියන් ප්රනාන්දු, 1991 වර්ෂයේදී, 21 වැනි ශිෂ්යභට නිලධාරී බඳවා ගැනීමට අයත් ශිෂ්යභට නිලධාරියෙකු වශයෙන් ශ්රී ලංකා නාවික හමුදාවේ විධායක අංශයට එක් වී ඇත. ත්රීකුණාමලය නාවික හා සාගරික විද්යාපීඨයෙන් ශිෂ්යභට නිලධාරී මූලික පුහුණුව සාර්ථකව සම්පූර්ණ කර, 1993 වර්ෂයේ උප ලුතිනන් වරයෙකු වශයෙන් අධිකාරියට පත් වන ඔහු, අවි සහ මිසයිල පිළිබඳ දීර්ඝ විශේෂඥ පාඨමාලාව ඉන්දියාවේ ‘INS Dronacharya’ පුහුණු පාසල වෙතින් 2003 වර්ෂයේදී හදාරා ඇත.
එමෙන්ම, 2010 වර්ෂයේදී නාවික අවි නඩත්තු ඉංජිනේරු පාඨමාලාව චීනයේදීත්, ආරක්ෂක අධ්යයනය පිළිබඳ පාඨමාලාව එක්සත් රාජධානියේ ආරක්ෂක අධ්යයන විද්යාපීඨය (Royal College of Defence Studies - RCDS) වෙතින්ද සාර්ථකව සම්පූර්ණ කර ඇති අතර, ආරක්ෂක අධ්යයනය පිළිබඳ විද්යාපති උපාධිය ජෙනරාල් ශ්රීමත් ජෝන් කොතලාවල ආරක්ෂක විශ්ව විද්යාලය වෙතින් ද, ජාත්යන්තර ආරක්ෂක උපායමාර්ග පිළිබඳ ශාස්ත්රපති උපාධිය එක්සත් රාජධානියේ ලන්ඩන් නුවර කිංග්ස් විශ්ව විද්යාලය තුලින් ද සාර්ථකව සම්පූර්ණ කර ඇත.
වයිස් අද්මිරාල් ඩේමියන් ප්රනාන්දු, සිය වසර 35 කට අධික සේවා කාලය තුළ ශ්රී ලංකා නාවික හමුදාවේ විවිධ නිලතල රාශියක් දරා ඇති අතර, වේග ප්රහාරක මුර යාත්රාවන්හි අණභාර නිලධාරි ලෙස සහ ශ්රී ලංකා නාවික හමුදා නෞකා සහ ආයතනයන් ගණනාවක අණදෙන නිලධාරී වශයෙන් රාජකාරී සිදු කර ඇත. තවද, නාවික යුදායුධ නිලධාරි, නියෝජ්ය අධ්යක්ෂ නාවික අවි, හතරවන වේග ප්රහාරක මුර යාත්රා සමූහයේ අණදෙන නිලධාරි, කපිතාන් මෙහෙයුම් දෙපාර්තමේන්තුව (බටහිර), ත්රිකුණාමලය නාවික හා සාගරික විද්යාපීඨයේ ආඥාපති, අධ්යක්ෂ ජෙනරාල් පුද්ගල, උතුරු මැද නාවික විධානයේ ආඥාපති, නැගෙනහිර නාවික විධානයේ ආඥාපති සහ නාවික හමුදා නියෝජ්ය මාණ්ඩලික ප්රධානී වශයෙන් කටයුතු කර ඇති වයිස් අද්මිරාල් ඩේමියන් ප්රනාන්දු, නාවික හමුදාධිපති වශයෙන් පත්වීමට පෙර, 2024 දෙසැම්බර් මස 31 වැනි දින සිට නාවික හමුදා මාණ්ඩලික ප්රධානී වශයෙන් කටයුතු කළ ශ්රී ලංකා නාවික හමුදාවේ කීර්තිමත් ජ්යේෂ්ඨ නිලධාරියෙකි.
තිස් වසරකට ආසන්න කාලයක් මෙරට වෙලා පැවති ත්රස්තවාදය පිටුදැකීම වෙනුවෙන් සිදුකෙරුණු මානුෂීය මෙහෙයුම සඳහා සක්රීයව දායකවී, සතුරා අභිමුව නොසැලී විදහාපෑ නිර්භීතභාවය වෙනුවෙන් රණශූර පදක්කමෙන් ද; අගනා සේවය, නොකැළැල් චරිතය සහ රාජකාරියට අඛණ්ඩ කැපවීම වෙනුවෙන් උත්තම සේවා පදක්කමෙන්ද පිදුම් ලබා ඇති වයිස් අද්මිරාල් ඩේමියන් ප්රනාන්දු වෙත ඔහුගේ සේවය අගයමින් අවස්ථා හතකදී නාවික හමුදාධිපතිවරුන් විසින් ප්රශංසාත්මක ලිපි ප්රදානය කර ඇත.
ශ්රී ලංකා නාවික හමුදා ක්රිකට් කණ්ඩාමේ දක්ෂ සාමාජිකයෙකු ලෙස කටයුතු කරමින් ක්රිකට් ක්රීඩාවෙන් නාවික හමුදාව වෙත කීර්තියක් ගෙනදීමට කටයුතු කර ඇති වයිස් අද්මිරාල් ඩේමියන් ප්රනාන්දු, නාවික හමුදා ක්රිකට් සංගමයේ සභාපති වශයෙන්ද සිය දායකත්වය ලබාදී ඇත.
වයිස් අද්මිරාල් ඩේමියන් ප්රනාන්දු 27 වන නාවික හමුදාධිපති ධූරයේ රාජකාරීන් නිල වශයෙන් භාරගත් අවස්ථාව සඳහා නාවික හමුදාධිපති ගේ දයාබර බිරිඳ, කෞෂල්යා ප්රනාන්දු මහත්මිය සහ ඔවුන් දෙපලගේ දියණියන් වන කල්ෂා ප්රනාන්දු, සිසිලියා ප්රනාන්දු හා පුතණුවන් වන ෆේබියන් ප්රනාන්දු ද සහභාගි වී සිටියහ.