කොළඹ සමුද්‍රීය සෙවීම් හා මුදාගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, කොළඹ ප්‍රදේශයට ඔබ්බෙන්වූ බටහිර මුහුදේ යාත්‍රා කරමින් තිබූ ජපාන ස්වයං ආරක්‍ෂක සමුද්‍රීය බලකායට අයත් “JMSDF ONAMI” නෞකාවේ, වෛද්‍ය ප්‍රථිකාර අවශ්‍යව සිටි කාර්යය මණ්ඩල සාමාජිකයෙකු, ශ්‍රී ලංකා නාවික හමුදාවේ සහයෙන් කඩිනමින් ගොඩබිමට රැගෙනවිත්, ප්‍රතිකාර සඳහා කොළඹ ජාතික රෝහල වෙත යොමු කිරීමට 2026 මාර්තු මස 06 වැනි දින නාවික හමුදාව විසින් කටයුතු කෙරිණි.

2026 මාර්තු මස 02 වැනි දින සැපයුම් හා සේවා සපුරා ගැනීම සඳහා දිවයිනට පැමිණි මාලදිවයින් වෙරළාරක්‍ෂක බලකායට අයත් ‘HURAVEE’ නෞකාව 2026 මාර්තු මස 04 වැනි දින දිවයිනෙන් පිටත්ව යන ලද අතර, එම නෞකාව වෙත ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකූලව සමුදීම, කොළඹ වරායේදී සිදු කෙරිණි.

“ක්ලීන් ශ්‍රී ලංකා” ජාතික ව්‍යාපෘතියට සමඟාමීව නාවික හමුදාව මඟින් ගාල්ල කරාපිටිය රෝහල් පරිශ්‍රය පවිත්‍ර කිරීමේ වැඩසටහනක් 2026 මාර්තු මස 02 වැනි දින එම රෝහල් පරිශ්‍රයේදී සිදුකෙරිණි.

මාලදිවයින් වෙරළාරක්‍ෂක බලකායට අයත් ‘HURAVEE’ නෞකාව සැපයුම් හා සේවා සපුරා ගැනීම සඳහා 2026 මාර්තු මස 02 වැනි දින දිවයිනට පැමිණි අතර, ශ්‍රී ලංකා නාවික හමුදාව විසින් එම නෞකාව නාවික හමුදා සම්ප්‍රදායානුකූලව පිළිගැනීම කොළඹ වරායේදී සිදු කෙරිණි.

ඉන්දියාවේ විසාකාපට්නම් වරාය ආශ්‍රිත නැගෙනහිර ඉන්දීය මුහුදු තීරය කේන්ද්‍ර කර ගනිමින්, 2026 පෙබරවාරි මස 18 සිට 26 වැනි දින දක්වා පැවැති MILAN - 26 බහුපාර්ශ්වික නාවික අභ්‍යාසය සහ ජාත්‍යන්තර යුද නෞකා නිරීක්ෂණය සඳහා ශ්‍රී ලංකා නාවික හමුදාව නියෝජනය කරමින් සහභාගී වූ ශ්‍රී ලංකා නාවික නෞකා සාගර සහ නන්දිමිත්‍ර නෞකා, අභ්‍යාසය සාර්ථකව නිමාවට පත්වීමෙන් අනතුරුව, 2026 පෙබරවාරි මස 27 දින දිවයිනට පැමිණි අතර, ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකූලව එම නෞකා ද්විත්වය පිළිගැනීම, කොළඹ වරායේ දී සිදුකෙරිණි.

නාවික හමුදාවේ දායකත්වය ඉහලින් අගයමින් කච්චතිව් ඓතිහාසික ශාන්ත අන්තෝනි මුනිඳුන්ගේ දේවස්ථානයේ වාර්ෂික දේව මංගල්‍යය, ශ්‍රී ලාංකික හා ඉන්දියානු බැතිමතුන් විශාල පිරිසකගේ සහභාගීත්වයෙන් 2026 පෙබරවාරි මස 27 සහ 28 දෙදින උත්කර්ෂවත් අයුරින් පැවැත්විණි.

ඉන්දීය නාවික හමුදාවට අයත් ‘INS TARANGINI’ නෞකාව නිල සංචාරයක් සඳහා 2026 පෙබරවාරි මස 27 වැනි දින දිවයිනට පැමිණි අතර, ශ්‍රී ලංකා නාවික හමුදාව විසින් එම නෞකාව, නාවික හමුදා සම්ප්‍රදායානුකුලව පිළිගැනීම ත්‍රිකුණාමලය වරායේදී සිදුකෙරිණි.

නාවික හමුදා සමාජීය මෙහෙවර ව්‍යාපෘතිය යටතේ, කුරුණෑගල දිස්ත්‍රික්කයේ වාරියපොල ප්‍රාදේශීය ලේකම් කොට්ඨාසයේ බයව ග්‍රාමයේ සහ අනුරාධපුර දිස්ත්‍රික්කයේ කහටගස්දිගිලිය ප්‍රාදේශීය ලේකම් කොට්ඨාසයේ ගෝනුමැරුවැව ග්‍රාමයේ ස්ථාපනය කල ප්‍රතිආශ්‍රැති ජල පිරිපහදු මධ්‍යස්ථාන දෙකක් (02) ජනතා අයිතියට පත්කිරීම 2026 පෙබරවාරි මස 24 සහ 25 යන දෙදින තුල සිදුකෙරිණි.

ශ්‍රී ලංකාව සහ එක්සත් ජනපදය අතර ආරක්‍ෂක සහයෝගීතාවය ශක්තිමත් කරමින්, ශ්‍රී ලංකා නාවික හමුදාව වෙත එක්සත් ජනපද වෙරළාරක්‍ෂක දෙපාර්තමේන්තුව මඟින් පසු ගිය 2025 දෙසැම්බර් මාසයේදී නිල වශයෙන් භාර දෙන ලද P 628, ගැඹුරු මුහුදු ආවේක්ෂණ නෞකාව, ශ්‍රී ලංකා නාවික හමුදා මෙහෙයුම් අවශ්‍යතාවන්ට අනුව නවීකරණයෙන් අනතුරුව, එක්සත් ජනපදයේ මේරිලෑන්ඩ් ප්‍රාන්තයේ, ‘බැල්ටිමෝර්’ හි එක්සත් ජනපද වෙරළාරක්‍ෂක නෞකා අංගනයේ සිට කොළඹ බලා 2026 පෙබරවාරි මස 20 වැනි දින ගමන් ආරම්භ කෙරිණි.

ඉන්දීයානු නාවික හමුදාව විසින් සංවිධානය කරන ලද ජාත්‍යන්තර යුද නෞකා නිරීක්‍ෂණ - 2026, සහ MILAN - 26 බහුපාර්ශ්වික නාවික අභ්‍යාසය ඉන්දියාවේ විසාකාපට්නම් වරාය ආශ්‍රිත නැගෙනහිර ඉන්දීය මුහුදු තීරය කේන්ද්‍ර කර ගනිමින්, 2026 පෙබරවාරි මස 18 වැනි දින සිට 26 වැනි දින දක්වා පැවැත්වේ. 2026 පෙබරවාරි මස 18 වන දින නැගෙනහිර ඉන්දීය මුහුදු ප්‍රදේශයේදී පැවති මෙම බහුපාර්ශ්වික නාවික අභ්‍යාසයේ ප්‍රමුඛ අංගයක් වන ජාත්‍යන්තර යුද නෞකා නිරීක්‍ෂණය සඳහා ශ්‍රී ලංකා නාවික හමුදාව නියෝජනය කරමින් ශ්‍රී ලංකා නාවික නෞකා සාගර සහ නන්දිමිත්‍ර නෞකා ද්විත්වය ද එක්විය. තවද, එම අවස්ථාව සඳහා ඉන්දීය නාවික හමුදා ප්‍රධානී අද්මිරාල් Dinesh K Tripathi ගේ ආරාධනයෙන් ශ්‍රී ලංකා නාවික හමුදාධිපති වයිස් අද්මිරාල් කාන්චන බානගොඩ සහභාගී වු අතර, කලාපීය හා ගෝලීය රාජ්‍යයන් නියෝජනය කරමින් පැමිණි යුද නෞකා නිරීක්‍ෂණය ඉන්දීය ගරු ජනාධිපතිනිය විසින් සිදුකෙරිණි.