ත්‍රිකුණාමලය, නාවික හා සාගරික විද්‍යාපීඨය මඟින් තෙවන වරටත් සංවිධානය කරනු ලබන ‘Commandant’s Cup Sailing Regatta - 2023’ රුවල් යාත්‍රා තරඟාවලියේ සමාරම්භක උත්සවය 2023 ජනවාරි මස 09 වන දින ත්‍රිකුණාමලය, කොමාණ්ඩර් ශාන්ති බහාර් අනුස්මරණ රුවල් යාත්‍රා සමාජයේදී නැගෙනහිර නාවික විධානයේ හා ස්වේච්ඡා නාවික හමුදාවේ ආඥාපති, රියර් අද්මිරාල් ධම්මික කුමාර ගේ ප්‍රධානත්වයෙන් පැවැත්විණි.

2023 ජනවාරි 08 වන දින කටුනායක ගුවන් හමුදා කඳවුර අසලින් ආරම්භ කෙරුණු 12 වන ආරක්‍ෂක සේවා පාපැදි ශූරතාවයේ සමස්ථ කාන්තා ශූරතාවය නාවික හමුදා කාන්තා පාපැදි කණ්ඩායම දිනා ගැනීමට සමත් විය.

2022 දෙසැම්බර් මස 22 වන දින පොළොන්නරුව ජාතික ගෘහස්ථ ක්‍රීඩා සංකීර්ණයේ පැවති 12 වන ආරක්‍ෂක සේවා බර ඉසිලීමේ තරඟාවලියේදී පිරිමි හා කාන්තා බර ඉසිලීමේ ශූරතාවය නාවික හමුදාව විසින් දිනා ගැනීමට සමත් වූ අතර, තරඟාවලියේ හොඳම බර ඉසිලීමේ ක්‍රීඩකයාට හිමි කුසලානය, පොදු රාජ්‍ය මණ්ඩලීය බර ඉසිලීමේ පදක්කම්ලාභී නාවික හමුදා ක්‍රීඩක, නායක නැවි ඩීඑම්අයිසී දිසානායක විසින් හිමි කර ගන්නා ලදී.

මහනුවර සීතාදේවි කාන්තා විද්‍යාලය සහ සීතාදේවි ක්‍රීඩා සමාජය එක්ව සංවිධානය කරන ලද, සීතාදේවි සය සාමාජික හොකී තරඟාවලිය - 2022, මහනුවර අස්ගිරිය ජාත්‍යන්තර ක්‍රීඩාංගණයේදී 2022 දෙසැම්බර් මස 17 සහ 18 දිනයන්හීදි සාර්ථකව පැවැත්වුනු අතර, එම තරඟාවලියේ පිරිමි ‘ඒ’ කාණ්ඩයේ ශූරතාවය හිමි කර ගැනීමට නාවික හමුදා ‘ඒ’ කණ්ඩායම සමත් විය‍.

2022 දෙසැම්බර් මස 14, 15 සහ 16 වන දින වැලිසර, කොමාණ්ඩර් පරාක්‍රම සමරවීර අනුස්මරණ ගෘහස්ත ක්‍රීඩාංගණයේ පැවති 12 වන ආරක්‍ෂක සේවා මේස පන්දු තරඟාවලිය නාවික හමුදා අධ්‍යක්‍ෂ ක්‍රීඩා කොමදෝරු රොෂාන් අතුකෝරළ ගේ ප්‍රධානත්වයෙන් පැවති අතර, එහිදී නාවික හමුදා ක්‍රීඩක ක්‍රීඩිකාවන් ජයග්‍රහණ රැසක් දිනා ගනිමින් තරඟාවලියේ පිරිමි අංශයේ කණ්ඩායම් ශූරතාවය දිනාගැනීමට සමත් විය.

ජාතික වේග හබල් ඔරු යාත්‍රා තරඟාවලිය - 2022 ජාතික වේග හබල් ඔරු යාත්‍රා සංචිතයේ සභාපති, රොහාන් ප්‍රීතිවිරාජ් පෙරේරා මහතා ගේ ප්‍රධානත්වයෙන් 2022 දෙසැම්බර් මස 16 සහ 17 යන දිනයන්හීදී බත්තරමුල්ල, දියවන්නා ඔයෙහි පැවැත්වූ අතර, එහිදි සමස්ථ විවෘත පිරිමි අනුශූරතාවය හිමි කර ගැනීමට නාවික හමුදා පිරිමි වේග හබල් ඔරු කණ්ඩායම සමත් විය.

2022 දෙසැම්බර් මස 08 සහ 09 යන දිනයන්හීදී ‍කොළඔ, බොරැල්ල දුම්රිය ක්‍රිඩාංගනයේ පැවැති රාජ්‍ය සේවා කාන්තා දැල් පන්දු තරඟාවලිය - 2022 තරඟාවලියේදී පොලිස් කණ්ඩායම හා ගුවන් හමුදා කණ්ඩායම පරාජය කරමින් තරඟාවලියේ ‘ඒ’ අංශයේ ලීග් ශුරතාවය දිනා ගැනීමට නාවික හමුදා කණ්ඩායම සමත් විය.

“Dr Nihal Jinasena Memorial Cup annual Sailing Regatta - 2022” රුවල් ඔරු තරඟාවලිය 2022 දෙසැම්බර් මස 03 වන දින වැලිගම, මිරිස්ස කප්පරතොට මුහුදු තීරයේදී සාර්ථකව පැවැත්වුනු අතර, එහිදී ජයග්‍රහණ රැසක් හිමි කර ගැනීමට නාවික හමුදා රුවල් ඔරු කණ්ඩායම සමත් විය.

නාවික හමුදා අන්තර් විධාන තුන්ප්‍රයාම තරඟාවලිය - 2022 අද (2022 නොවැම්බර් 26) දික්ඕවිට හා උස්වැටකෙයියාව වෙරළ ප්‍ර‍දේශය කේන්ද්‍ර කර ගනිමින් පැවත්වුනු අතර, එහිදී පිරිමි අංශයේ ශූරතාවය උතුරු නාවික විධානය විසින්ද, කාන්තා අංශයේ ශූරතාවය බටහිර නාවික විධානය විසින්ද දිනා ගන්නා ලදී.

2022 නොවැම්බර් මස 22 සිට 24 දක්වා පනාගොඩ යුද හමුදා කඳවුරු පරිශ්‍රයේදී පැවැත්වූණු 12 වන ආරක්‍ෂක සේවා මල්ලවපොර තරඟාවලියේදී ජයග්‍රහණ රැසක් දිනා ගනිමින්, තරඟාවලියේ පිරිමි අංශයේ සම ශූරතාවය ගුවන් හමුදාව සමඟ දිනාගැනීමට නාවික හමුදා පිරිමි මල්ලවපොර කණ්ඩායම සමත් වූ අතර, කාන්තා අංශයේ අනුශූරතාවය නාවික හමුදා කාන්තා මල්ලවපොර කණ්ඩායම් විසින් දිනාගැනිමට සමත්විය.